Padmakar Shivalkar Passes Away Age 84 : मुंबईचे महान डावखुरे फिरकीपटू पद्माकर शिवलकर यांचे वयाच्या 84व्या वर्षी निधन झाले. सोमवारी (3 मार्च) वयाशी संबंधित आजारांमुळे त्यांनी अखेरचा श्वास घेतला.
भारताकडून न खेळलेला सर्वोत्तम फिरकीपटू
पद्माकर शिवलकर हे भारताकडून कसोटी सामना न खेळलेले सर्वोत्कृष्ट फिरकीपटू मानले जातात. त्यांनी 1961-62 ते 1987-88 या कालावधीत 124 प्रथम श्रेणी सामने खेळले. या काळात त्यांनी 19.69 च्या सरासरीने 589 बळी घेतले.
🔴 हेही वाचा 👉 IND vs AUS: भारतीय खेळाडू काळ्या पट्ट्या घालून का खेळत आहेत? जाणून घ्या कारण.
48व्या वर्षापर्यंत क्रिकेट खेळले
शिवलकर यांनी रणजी ट्रॉफीत 22व्या वर्षी पदार्पण केले. त्यानंतर तब्बल 26 वर्षे ते क्रिकेट खेळले. त्यांनी एकूण 361 रणजी बळी घेतले, ज्यामध्ये 11 वेळा एका सामन्यात 10 विकेट्स घेतल्या. तसेच, 12 लिस्ट ए सामन्यांमध्ये त्यांनी 16 बळी घेतले.
बीसीसीआयचा सी.के. नायडू जीवनगौरव पुरस्कार
2017 मध्ये भारतीय क्रिकेट बोर्डाने त्यांना प्रतिष्ठित सी.के. नायडू जीवनगौरव पुरस्काराने सन्मानित केले. त्यांच्या अप्रतिम फिरकीमुळे मुंबईला अनेक विजय मिळवता आले आहेत.
मुंबई क्रिकेट असोसिएशनची श्रद्धांजली
मुंबई क्रिकेट असोसिएशनचे अध्यक्ष अजिंक्य नाईक यांनी त्यांना श्रद्धांजली वाहताना म्हटले, “मुंबई क्रिकेटने आज एक महान खेळाडू गमावला. पद्माकर शिवलकर सरांचे योगदान नेहमी लक्षात राहील.”
ते पुढे म्हणाले, “त्यांची निष्ठा, कौशल्य आणि मुंबई क्रिकेटवरील प्रभाव अतुलनीय होता. त्यांच्या जाण्याने क्रिकेट विश्वाला मोठी हानी झाली आहे. त्यांच्या आत्म्याला शांती लाभो.”
भारतीय क्रिकेटला घडवणाऱ्या या महान फिरकीपटूला संपूर्ण क्रिकेट विश्वाची श्रद्धांजली!
🔴 हेही वाचा 👉 भारत आणि ऑस्ट्रेलिया उपांत्य फेरीसाठी भारताचा संभाव्य संघ निश्चित.
